Աղավնավանք, Գոշավանք, Պարզ լիճ / Գոշ լիճ, Հաղարծին և Դիլիջան (1 օր)

▶️ Առավոտյան Երևանից ուղևորվում ենք դեպի գեղատեսիլ Դիլիջան, ապա լեռների ու անտառների մեջ թաքնված Գոշ գյուղ: 1178 թ. Գոշում է կառուցվել Գոշավանքի հոյակերտ վանական համալիրը։ Գոշավանքը համարվել է ժամանակի լավագույն կրթական համալիրներից մեկը։ Այստեղ են սովորել այնպիսի գործիչներ, ինչպիսիք են Վանական վարդապետը և Կիրակոս Գանձակեցին։
Այնուհետև կշարժվենք դեպի անտառի մեջ թաքնված ☘️ Աղավնավանք, պահպանված եկեղեցին 12-13-րդ դարերի վանական համալրի մասն է կազմում՝ կառուցված դեղնավուն, սրբատաշ չեչաքարից:
Գոշավանքից կարող ենք քայլել դեպի դյութական Գոշ լիճ (4 կմ քայլարշավ) կամ այցելել Պարզ լիճ, որի երանգները շատ ներդաշնակ են բնության գույների հետ: Պարզ լճի ճանապարհին կարող ենք այցելել վերջերս բացված Ազնվացեղ եղջերուների բուծարան՝ հետաքրքիր մի վայր, որի նպատակն է վերականգնել մեր լեռնաշխարհին հատուկ կենդանական բազմազանությունը:
Տպավորություններով լի մեր ճանապարհը կշարունակենք դեպի Հաղարծին վանք, կտեսնենք ևս մեկ հրաշալի կառույց՝ շրջապատված անզուգական գեղեցկություն ունեցող լեռներով և անտառներով:

Երևան վերադառնալուց առաջ կարող ենք կանգառ անել Դիլիջանի կենտրոնում՝ Շարամբեյան փողոցում, ուր գեղեցիկ ավանդական տներ և արհեստանոցներ կան: Իսկ վերջում կվայելենք անզուգական Սևանա լճի գեղեցկությունը:
Եվ, իհարկե, տպավորված մեր լեռնաշխարհի գեղեցկությամբ, կվերադառնանք Երևան: