Քայլարշավ Լոռիում. Քառասնից, Բարձրաքաշ, Ծովեր, Դսեղ (1 օր)

Երևանից առավոտյան կշարժվենք դեպի Ամենայն հայոց բանաստեղծ Հ. Թումանյանի ծննդավայր՝ լեռների ու կանաչի մեջ կորած Դսեղ: Մեր առաջին կանգառը կլինի բանաստեղծի տուն-թանգարանը (մուտքը վճարովի):
Թանգարանի հարևանությամբ կտեսնենք Սուրբ Գրիգոր Լուսավորիչ եկեղեցին, որտեղ որպես հոգևորական ծառայել է Թումանյանի հայրը՝ Տեր Թադևոսը:
Այստեղից կուղևորվենք արձանագրություններով և խաչապատկերներով հարուստ 13-րդ դարի Քառասնից Մանկանց վանք, որն այժմ, ցավոք, կիսաավեր վիճակում է:
Լոռվա բնության մեջ գեղեցիկ կածաններով կշարունակենք ճանապարհը դեպի Բարձրաքաշ Սուրբ Գրիգոր վանքը (XIII դ.): Այստեղ է գտնվում նաև Մամիկոնյան իշխանական տոհմի գերեզմանոցը, ձիթհանը և խաչքարերի մնացորդները։ Վանքը գտնվում է Մարզ գետի հարևանությամբ, ուր հասնելու համար անհրաժեշտ է քայլել մոտ 20-30 րոպե:
Մեր մյուս կանգառը կլինի Սիրուն Խաչ կամ Տերունական Խաչ անունը կրող հսկա խաչքարը: 4.20 մ բարձրություն ունեցող 1251 թ. թվագրվող խաչքար կարելի է հասնել միայն մոտ 20 րոպեանոց քայլարշավի միջոցով, որի ընթացքում կարելի է վայելել բնության աննման տեսարաններ:
Քայլարշավի մեր մյուս կանգառը չքնաղ Ծովեր լիճն է՝ Լոռվա աշխարհի մարգարիտներից մեկը:
Օրվա վերջ հրաժեշտ տալով Դսեղին՝ վառ տպավորություններով լի կվերադառնանք Երևան: