Սյունիք-Զանգեզուր (3 օր)

Առավոտյան Երևանից մեկնում ենք դեպի Սյունյաց աշխարհ` անցնելով Արարատի և Վայոց Ձորի մարզերով: Ճանապարհին մեզ կուղեկցեն Արարատ լեռան և Արփա գետի գեղեցիկ տեսարանները: Վայոց Ձորի մարզում (Վայքում) տեղի կունենա մեր առաջին կանգառը, որտեղ կնախաճաշենք և կշարունակենք ճանապարհը: Գեղեցիկ, բարձրաբերձ Զանգեզուրի լեռներով ճանապարհը մեզ կտանի դեպի Շաքիի գեղատեսիլ ջրվեժ: Այստեղ կվայելենք Շաքիի զովությունը ու գեղեցկությունը, որից հետո կշարունակենք մեր ճանապարհը Քարահունջ: Հաջորդ կանգառը առեղծվածներով լի, պատմամշակութային արգելոց հանդիսացող Քարահունջն է (Զորաց քարեր): Ծանոթանալով Քարահունջի պատմությանը՝ կշարունակենք ճանապարհը դեպի Գորիս ապա Տաթևի վանական համալիր՝ մեր միջնադարյան ճարտարապետական գլուխգործոց: Ճանապարհին կտեսնենք Սատանի կամուրջը, ինչպես նաև Սյունյաց աշխարհի վեհաշուք լեռների և ձորերի վրա խոյացող Շինուհայրի դիտակետ: Այստեղից բացվող գեղեցիկ տեսարաններով զմայլվելուց, լեռների հզորությունը զգալուց հետո մենք կուղևորվենք դեպի Գորիս/Կապամ: Գիշերակաց հյուրանոցում:

Երկրորդ օրը կսկսենք նախաճաշով և կուղևորվենք Հայաստանի ամենահարավ՝ Մեղրի: Կտեսնենք մեր մայր գետը՝ Արաքսը, հայ-իրանական սահմանին: Հաջորդիվ՝ կոլորիտային Մեղրին է: Այստեղ կայցելենք Մեղրիի Սբ. Հովհաննես եկեղեցի, որում կտեսնենք վերականգնված յուրահատուկ որմնանկարներ: Ցանկության դեպքում կայցելենք Մեղրիի ամենահին տունը և կծանոթանանք Մեղրիի կենցաղին: Այնուհետև՝ Մեղրիի Ս. Աստվածածին եկեղեցի:
Մեղրիից հետո կուղևորվենք զմրուխտյա կանաչ անտառներում թաքնված միջնադարյան վանական համալիր Վահանավանք: Հաջորդիվ՝ քայլարշավ դեպի պատմական Հալիձորի բերդ: Այստեղ մոտ 1 ժամ քայլարշավից հետո մեր առջև կտեսնենք Հալիձորի հիասքանչ, անմատչելի բերդը և եկեղեցին: Հետո կրկին 1 ժամ քայլարշավից հետո կվերադառնանք Սյունիքի մարզկենտրոն՝ Կապան, որին տեղաբնիկները տվել են հայկական Փարիզ անվանումը: Կապանում նախ՝ զորավար Գարեգին Նժդեհի հուշարձան, Ողջի և Վաչագան գետեր, քաղաքի գեղեցիկ համայնապատկեր: Զբոսանք Գորիսում. Սբ. Գրիգոր Լուսավորիչ եկեղեցի, Կապադովկիային նմանվող բրգաձև ժայռեր: Գիշերակաց հյուրանոցում:

Երրորդ օրը նախաճաշից հետո կուղևորվենք Հին Խնձորեսկ, որտեղ կանցնենք ճոճվող կամուրջով, կտեսնենք Խնձորեսկի քարանձավները, որոնք մեզ կհիշեցնեն Ակսել Բանկունցի պատմվածքները, կայցելենք Սբ. Հռիփսիմե վանք և հետդարձին կտեսնենք Մխիթար սպարապետի գերեզմանը: Այնուհետև կուղևորվենք Որոտանի կիրճի ձախակողյան բարձունքի վրա գտնվող միջնադարյան հռչակավոր վանական համալիր՝ Որոտնավանք: Կուսումնասիրենք զորավոր վանական համալիրն ու Որոտանի գեղեցիկ կիրճը: Ապա ցանկություն և ժամանակ լինելու պայմանով, կարող ենք մոնենալ Տոլորսի գեղատեսիլ ջրամբարին, ուր տարվա որոշ եղանակներին կարելի է նավակով մոտենալ ջրի մեջ կիսով չափ երևացող եկեղեցուն (նավակը՝ վճարովի): Ճանապարհին կկանգնենք Եղեգնաձորում, կճաշենք և կվերադառնանք Երևան՝ մեզ հետ բերելով գեղեցիկ տպավորությունները: