բանիմաց և հոգատար գիդեր
  • No products in the cart.
TOP

Գյումրի-Շիրակ. Մարմաշեն, Հառիճավանք, Երերույք, Լմբատավանք, Ջրափի (2 օր)

Գյումրի, Երերույք, Մարմաշեն, Հառիճավանք, Լմբատավանք, Ախուրյան, Ջրափի (2 օր)

 

Տուրի տեւողություն
2 օր


Համառոտ նկարագրություն
Պատմական Հայաստանի Այրարատ աշխարհի Շիրակ գավառը միշտ հայտնի է եղել իր բերքառատ հողով, օգտակար հանածոներով, տաղանդավոր մարդկանցով և իհարկե հոգևոր և աշխարհիկ ճարտարապետության հրաշալի կառույցներով: Մեր այս տուրի շրջանակում կբացահայտենք Շիրակի կենտրոն Գյումրին, վարդագույն տուֆի հայրենիք Արթիկը, ինչպես նաև մի շարք արժեքավոր պատմամշակութային վայրեր:

 Տուրեր Հայաստանի ներսում և Արցախում
 
  • Արժեքը ներառում է
    ա) բարձրակարգ հյուրանոցում գիշերակաց՝ նախաճաշով,
    բ) բարձրակարգ տրանսպորտ փորձառու վարորդով, Երևան-Գյումրի գնացքի տոմս (գնացքով գնալու դեպքում),
    գ) բանիմաց և հոգատար պատմաբան-գիդի ուղեկցություն ողջ ընթացքում,
    դ) այցելություն նշված վայրեր, ըստ ծրագրի:

Ուղևորության ծրագիր.

Օր1

Դեպի Գյումրի՝ գնացքով կամ ավտոբուսով

  • Կենտրոնական հրապարակ և Վարդանանք արձանախումբ
  • "Մեր մանկության տանգո" ֆիլմի հայտնի պատշգամբ
  • Ռիժկովի ճեմափողոց
  • Սուրբ Աստվածածին Յոթ Վերք, Ամենափրկիչ եկեղեցիներ
  • Կումայրի արգելոց-թանգարան. Վարպետաց, Աբովյան, Ռուսթավելի, Ջիվանու, Շերամի, Չերազի, Աճեմյան փողոցներ
  • Գյումրվա ամենահին դեղատուն, վարսավիրանոց, Քաջազնունու նախագծած «Լոդկա» շենք
  • Սուրբ Նշան եկեղեցի
  • Թանգարաններ, թատրոններ (վճարովի, ըստ ցանկության)
Ուղևորությունը կսկսենք Երևանի Սասունցի Դավիթ կայարանից վաղ առավոտյան (գնացքով մեկնելու դեպքում): Արմավիրի,Արագածոտնի, Շիրակի մարզերի գեղեցիկ բնապատկերները վայելելով ☘️ կեսօրին կհասնենք Գյումրի: Քաղաքային զբոսանքի ընթացքում կտեսնենք.
Կենտրոնական հրապարակ և Վարդանանք արձանախումբ,
"Մեր մանկության տանգո" ֆիլմի հայտնի պատշգամբ,
Ռիժկովի ճեմափողոց,
Սուրբ Աստվածածին Յոթ Վերք, Ամենափրկիչ եկեղեցիներ,
Կումայրի արգելոց-թանգարան. Վարպետաց, Աբովյան, Ռուսթավելի, Ջիվանու, Շերամի, Չերազի, Աճեմյան փողոցներ,
Գյումրվա ամենահին դեղատուն, վարսավիրանոց, Քաջազնունու նախագծած «Լոդկա» շենք,
Սուրբ Նշան եկեղեցի:
Ցանկության դեպքում կարող ենք այցելել աշխարհահռչակ գյումրեցիների թանգարաններից մեկը.
️Հովհաննես Շիրազի, Ավետիք Իսահակյանի, Մհեր Մկրտչյանի, Ասլամազյան քույրերի, Գյումրու քաղաքային կենցաղի և ճարատարապետության թանգարան՝ Ձիթողցյանների տուն կամ ներկա գտնվել թատերական որևէ ներկայացմանը:
Իսկ օրվա վերջում կվայելենք Գյումրու համեղ կերակուրներ՝ հյուրանոցում կամ տեղի ռեստորաններից մեկում: Գիշերակաց Գյումրիի հյուրանոցում:
Օր2

Պատմական Շիրակ և Արագածոտն

  • Մարմաշենի վանք
  • Վահրամաբերդ
  • «Հեղնար աղբյուր» հուշակոթող
  • Լմբատավանք՝ Սուրբ Ստեփանոս եկեղեցի քայլարշավ
  • Հառիճավանք
  • Ախուրյանի ջրամբար
  • Ջրափիի քարավանատուն և եկեղեցի
  • Երերույքի տաճար
Առավոտյան՝ նախաճաշից հետո կուղևորվենք դեպի Անի-Շիրակի ճարտարապետական դպրոցին պատկանող, Ախուրյան գետի ձախափնյա հովտում գտնվող 10-11-րդ դդ. հոյակերտ տաճարներից մեկը՝ Մարմաշենի վանք: ✝️ Վանական համալիրը բաղկացած է երկու հուշարձանախմբից` Մեծ և Փոքր: Մեծ հուշարձանախումբը բաղկացած է Կաթողիկե եկեղեցուց, երեք եկեղեցիներից, գավթից և գերեզմանատնից: Ըստ հարավային պատի արձանագրության՝ Կաթողիկեն կառուցել է Վահրամ Պահլավունին 988-1029թթ․: Նաև կիջնենք Ախուրյան գետի ափ և կըմբոշխնենք Ախուրյանի գեղատեսիլ կիրճի տեսարանը։ Կայցելենք նաև Վահրամաբերդ գյուղի ձորակ՝ տեսնելու քարտաշ վարպետ Մկրտչի հիմնած «Հեղնար աղբյուր» հուշակոթողը, որը 2018թ․ ամբողջությամբ վերակակգնել են՝ ճարտարապետական և քանդակագործական նույն լուծումներով, ինչպես ֆիլմում էր: Աղբյուրի «հրաշքը» ևս պահպանվել է։
Այնուհետև կշարունակենք մեր ճանապարհը դեպի մանուշակագույն-վարդագույն տուֆի հայրենիք՝ քաղաք Արթիկ: Կբարձրանանք ոտքով և կայցելենք 6-րդ դարում կառուցված, յուրօրինակ որմնանկարներով հայտնի Լմբատավանք (Սուրբ Ստեփանոս եկեղեցի), կտեսնենք Եզեկիել մարգարեի տեսիլքի հիման վրա ստեղծված «Աստվածահայտնության» տեսարանը պատկերող որմնանկարների պահպանված մասերը: Լմբատավանքի մոտակայքից կվայելենք նաև Արթիկի գեղեցիկ համայնապատկերը։
Ապա ճանապարհը կտանի դեպի Հառիճ գյուղ, որտեղ գտնվում է 13-րդ դարի հայկական ճարտարապետական գլուխգործոցներից մեկը համարվող Հառիճավանքը: Նուրբ զարդաքանդակներով և ուրույն ճարտարապետությամբ այս վանական համալիրը իր վերջնական տեսքը ստացել է 1201թ., երբ Զաքարե ու Իվանե Զաքարյան եղբայրների հրամանով կառուցվել է վանքի գլխավոր եկեղեցին: Եկեղեցուց զատ, կտեսնենք նաև Ճգնավորի խուցը և վանքի՝ վերջերս վերանորոգված հոգևոր դպրոցը, որտեղ 1887-1889 թթ․ սովորել է Ավետիք Իսահակյանը։
Հառիճից կշարժվենք դեպի Ախուրյանի ջրամբար, կանցնենք Գուսանագյուղը, Շիրակավանը և կհասնենք Ջրափի, ուր գտնվում են գեղեցիկ կառույցներ՝ միջնադարյան քարվանսարան և եկեղեցին:
Մեր հաջորդ կանգառը խորհրդավոր Երերույքի տաճարն է՝ կառուցված վաղ քրիստոնեական շրջանում (4-5-րդ դդ.): Բազիլիկ ոճով կառուցված տաճարը ամենամեծն է վաղ միջնադարյան մեզ հայտնի կառույցներից և ամենաառեղծվածային հուշարձաններից մեկը Հայաստանում:
Հագեցած ուղևորության վառ տպավորություններով՝ երեկոյան կվերադառնանք Երևան:

Չվացուցակ

ՕրՍկիզբԱվարտԳինՍտատուս


Բոլոր իրավունքները պահպանված են: © 2008-2022 “Նարեկավանք Տուր” ("Էն-Վի Տուր" ՍՊԸ):
Վեբ կայքի ամբողջ բովանդակությունը` այդ թվում ապրանքային նշանը, դիզայնը, տեքստը, գրաֆիկական պատկերները, լուսանկարները և այլն, “Նարեկավանք Տուր” հեղինակային իրավունքն են:
Բովանդակության որևէ մաս չի կարող վերարտադրվել որևէ կերպ և որևէ միջոցով` էլեկտրոնային կամ այլ, առանց “Նարեկավանք Տուր”-ի նախնական գրավոր թույլտվության: