nvtour@gmail.com +374 10 56 56 49 ,+374 99 56 56 48
ճանաչել ավելին
  • No products in the cart.
TOP

ԱՐԵՎՄՏՅԱՆ ՀԱՅԱՍՏԱՆ ՈՒԽՏԱԳՆԱՑՈՒԹՅՈՒՆ աստվածաբան Թովմաս Առաքելյանի և լուսանկարիչ Վիգեն Մնոյանի հետ (3 օր)

138՛000 դրամ
 

Տուրի տևողություն
3 օր, 2 գիշեր


Համառոտ նկարագրություն


Հիշողությունը կարևոր արժեք է, արմատին կպած ապրելը` առաքելություն։ Գալիքը կերտելու լավագույն ճանապարհը մեր պատմությանը լավ ծանոթանալն ու վերարժևորելն է։

Հրավիրում ենք հոգևոր, կրթական ու մշակութային ուխտագնացության դեպի Արևմտյան Հայաստան։ Ծրագրում են Անիի, Կարսի, Վանի ու Մուշի մեր հզոր եկեղեցիներն ու վանքերը։ Կտեսնենք պատմական հայրենիքի բնաշխարհը` Վանա լիճ, Բերկրիի ջրվեժ, Սիփան, Թոնդրակ, Արարատ և Բինգյոլի խրոխտ լեռներ։ Աղոթք կվերառաքենք չտեսնված Վարագավանքում։ Վանում կլինենք նաև Մհերի դռան մոտ, կտեսնենք վանա կատուներին, կհամտեսենք տառեխ ձուկը։ Իսկ հետո` Մշո դաշտ, Արածանի (ուր մկրտվել է հայ ժողովուրդը), Սուլուխի և Հովվի կամուրջներ, Խնուսի շրջան, Սարիղամիշի անտառներ, Բասենի դաշտ։ Հագեցած այս օրերը կանմահանան ոչ միայն մեր հիշողության, այլ նաև Վիգեն Մնոյանի լուսանկարների շնորհիվ։
Ճամփորդելիս կլսենք նաև Թովմասի զրույց-դասախոսությունը Հայոց եկեղեցու ոչ միայն սոսկ կրոնական, այլև քաղաքակրթական ուժի մասին։ Կունենանք աղոթական պահեր, մտերմիկ ու ջերմ շփում, գիտահեն և ճշգրիտ տեղեկատվություն։

Այս ուխտագնացությունը կազմակերպվում է հոգևոր ուխտագնացությունների
«Վերև» ծրագրով` Նարեկավանք Տուրի հետ համատեղ։ Մեր պատմական տարածքներում Նարեկավանք Տուրն ունի ամենից վստահելի, երկարատև և ամուր կապեր տեղի գործընկերների հետ: Արևմտյան Հայաստան եռօրյա տուրեր Նարեկավանքն իրականացնում է 2010 թվականից: Ճամփորդե՛նք պատմամշակութային ուղևորությունների ոլորտում ամենափորձառու ընկերության հետ։

 Մոտակա տուր
5 ապր. 2026
1 մյս. 2026
 Հավաքվում է 
 Տուր Արեւմտյան Հայաստան,
Համշեն, վերելք Արարատ
 
  • Արժեքը ներառում է
    ուղեկցություն և մտերմիկ դասախոսություններ աստվածաբան, արվեստի պատմության, տեսության և կառավարման մասնագետ Թովմաս Առաքելյանից,
    պրոֆեսիոնալ լուսանկարիչ Վիգեն Մնոյանի ուղեկցություն և ճամփորդության ավարտից հետո` որակյալ լուսանկարների մեծ փաթեթ,
    գիշերակաց բարձրորակ հյուրանոցներում (2 հոգի 1 սենյակում հաշվարկով),
    տրանսպորտ` օդափոխիչով և հարմար թիկնաթոռներով,
    համեղ ուտեստներով, լիարժեք 2-անգամյա սնունդ,
    նավարկություն և ճաշ լճի ափին (Վանա տառեխ),
    պատմամշակութային հաստատությունների տոմսեր,
    ճանապարհային բժշկական ապահովագրություն,
    երկար տարիների փորձ ունեցող, կրթված, հոգատար գիդ-մենեջերի (երկրի, պատմության, լեզուների մասնագետի, թուրքագետի) ուղեկցություն:
    ՆԵՐԱՌՎԱԾ ՉԷ մուտքի վիզայի արժեքը, որ ՀՀ քաղաքացիների համար կազմում է 17.000 դրամ, ՌԴ, ԵՄ մեծամասամբ և ԱՄՆ քաղաքացիների համար մուտքն առանց վիզա է:

Ուղևորության ծրագիր.

Օր1

Երևանից Անի և Բայազետ

  • Ջավախք, Ծովակ լիճ, Արդահանի մարզ,
  • Մայրաքաղաք Անի,
  • Մայր Տաճար, Սուրբ Ամենափրկիչ,
  • Տիգրան Հոնենց եկեղեցու որմնանկարներ,
  • Առաքելոց, Գագիկաշեն, Աբուղամրենց և այլ կառույցներ, պարիսպներ
  • անցում Կողբով և Իգդիրով:
▶️ Վաղ առավոտյան Երևանից կուղևորվենք դեպի Բավրա` հայ-վրացական սահման: Կհատենք սահմանը և կմտնենք Ջավախք: Պատմական Գուգարք նահանգի մաս կազմող Ջավախք աշխարհը հայտնի է յուրօրինակ բնությամբ, լեռներով, դաշտերով ու զուլալ ջրերով, որոնց ուղեկցությամբ էլ ճանապարհը կշարունակենք դեպի վրաց-թուրքական սահման: Կշարունակենք մեր ուղևորությունն Արդահանի նահանգով: Մինչ թագավորանիստ Կարս հասնելը կկանգնենք, կհանգստանանք Հայկական լեռնաշխարհի Ծովակն Հյուսիսո լճի մոտ: Հետո կշարժվենք դեպի Կարսի սարահարթ, ապա՝ մայրաքաղաք Անի: Անին 9-11-րդ դարերի Հայոց թագավորության ամենահզոր մայրաքաղաքն էր։ Մենք հռչակում ենք՝ տեսնել Անին ու ապրե՛լ․ ապրել Հայոց գալիք հաղթանակի վճռական տեսիլքով։ Այստեղ ոչ միայն կտեսնենք միջնադարյան զորեղ պարիսպներն ու աշտարակները, շքեղ տաճարները՝ Մայր Տաճար, Սբ. Ամենափրկիչ, որմնանկարներով հարուստ Տիգրան Հոնենց, եզակի հա-տակագծով Գագիկաշեն, ինքնատիպ Սբ. Առաքելոց, այլ նաև կզրուցենք այս կոթողների հետ՝ զգալով նրանց շունչն ու ոգին։ Անիից դուրս գալով` կշարունակենք ճանապարհը դեպի հարավ, կանցնենք Արաքսը, ուր մի պահ կանգ կառնենք մայր գետին մոտենալու համար, ապա Կողբը, Իգդիրը և կհասնենք Բայազետ: Գիշերակացը կլինի Բայազետի կամ Վանի հյուրանոցում:
Օր2

Վան-Վասպուրական աշխարհում

  • Բերկրիի ջրվեժ, Թոնդրակի լեռնանցք, Արարատի տեսարան,
  • Վան-Վասպուրական աշխարհ,Վանա լիճ և քաղաք,
  • Վարագավանք, Մհերի դուռ,Վանի բերդ,
  • Վանա կատուներ, Վանա տառեխ,
  • Աղթամար կղզի, Սուրբ Խաչ եկեղեցի։
▶️ Առավոտյան Բայազետից կբացվի Արարատի չքնաղ տեսարանը հակառակ (հարավային) կողմից: Անցնելով Ծաղկանց լեռները` Թոնդրակ հրաբխի հանգած լավայի մոտով Վան-Վասպուրական աշխարհ կիջնենք: Առաջին կանգառը կլինի գեղատեսիլ Բերկրիի ջրվեժում: Ապա Վան քաղաքն է, Փոքր Մհերի ժայռափոր դուռը, որ գրեթե 3․000 տարվա պատմություն ունի, և Վարագավանքը: Վանի բերդից քիչ հեռու կայցելենք բուծարան, ուր ապրում են Վանա սպիտակամազ կատուները՝ առավել հայտնի իրենց տարբեր գույնի՝ դեղին և կապույտ աչքերով: Այնուհետև, Վանա լճի գեղեցիկ տեսարանը վայելելով, կհասնենք նավամատույց, կնավարկենք դեպի Աղթամար` փիրուզե լճում մի գեղեցիկ կղզի, ուր գտնվում է իր նմանը չունեցող Սբ Խաչ եկեղեցին (10-րդ դար): Սբ Խաչը համարվում է միջնադարյան հայ և համաշխարհային հոգևոր ճարտարապետության գլուխգործոց, այն պատված է Աստվածաշնչյան թեմաներին նվիրված հրաշալի բարձրաքանդակներով, իսկ ներսի կողմից` գեղեցիկ որմնանկարներով: Աղթամարում կհանգստանանք և կվայելենք Վանա լճում լողալու հաճույքը: Քիչ անց՝ ճաշին, նավամատույցին մոտ սեղանատանը կհամտեսենք հայտնի Վանա տառեխ, որը լճում ապրող միակ տեսակի ձուկն է: Աղթամարից կշարունակենք ճանապարհը դեպի արևմուտք, կանցնենք Դատվան քաղաքը, Նեմրութի ստորոտով կիջնենք Մշո դաշտ, ուր մեզ կսպասի անուշ Մուշը: Գիշերակացը կլինի Մուշ քաղաքի հյուրանոցում:
Օր3

Մուշ՝ Տարոնից Կարս և Երևան

  • Մուշ քաղաք, Մշո դաշտ և Արածանի,
  • Խնուսի շրջան և Բինգյոլի լեռներ,
  • Սուլուխի և Հովվի կամուրջներ,
  • Բասենի դաշտ,
  • Սարիղամիշի անտառներ,
  • Կարս քաղաք և բերդ,
  • Վարդանի կամուրջ,
  • Սբ Առաքելոց եկեղեցի,
  • Չարենցի տան ավերակներ։
▶️ Մուշի հյուրանոցում արթնանալուց և նախաճաշելուց հետո կայցելենք մի շարք նշանավոր վայրեր: Նախ Մուշի հին թաղում կլինենք խոնարհված Սուրբ Մարինե եկեղեցում, որի դիմացի բլրի վրա դեռ կարելի է նշմարել հայկական ավիրված գերեզմանատան քարերը: Քաղաքից կիջնենք դեպի Մշո անուշ դաշտ, Տարոնի զարդ, որն առատորեն սնում է առասպելական Արածանին՝ Արևելյան Եփրատը: Ահա և նշանավոր Սուլուխի կամուրջը, ուր իր հերոսական մահկանացուն կնքեց ֆիդայապետ Գևորգ Չաուշը: Մշո դաշտին հրաժեշտ տալով՝ կելնենք դեպի Վարդո, Խնուս և Բինգյոլի լեռներ, ապա կիջնենք Բասենի դաշտ՝ որով անցնում է Էրզրում-Կարս ճանապարհը: Այստեղ միախառնվում են Արաքս և Մուրց գետերը, հենց դրանց վրա դարեր առաջ կառուցվել է գեղեցիկ Հովվի կամուրջը: Դեպի արևմուտք արդեն Սարիղամիշի լեռներն ու անտառներն են, ապա նաև Կարսը: Կտեսնենք բազմաթիվ գեղեցիկ շենքեր, Կարսի միջնաբերդը՝ Բագրատունիների նստավայրն իր աշտարակներով և զորանոցներով, Եղիշե Չարենցի` այդքան գունեղ ներկայացված «Վարդանի» կամուրջը և Կարս գետը, և իհարկե այն վայրը, ուր հենց իր՝ Չարենցի տունն էր գտնվում: Բերդի տակ արդեն հազար տարի հզոր և հպարտ կանգնած է Սբ Առաքելոց եկեղեցին (10-րդ դար)՝ այն թեև մզկիթի է վերածված, բայց դա սոսկ ձև է և ոչ բովանդակություն... Կարսից կշարժվենք դեպի թուրք-վրացական սահման: Կմտնենք Վրաստան, Ջավախքում կընթրենք և կշարունակենք երթուղին։ Երեկոյան կժամանենք Երևան:

Չվացուցակ

ՕրՍկիզբԱվարտԳինՍտատուս
35 ապր. 20267 ապր. 2026138՛000 դրամՀավաքվում է
31 մյս. 20263 մյս. 2026138՛000 դրամ

Բոլոր իրավունքները պահպանված են: ©“Նարեկավանք Տուր” ("Էն-Վի Տուր" ՍՊԸ) հիմնվել է 2008 թվականին:
Վեբ կայքի ամբողջ բովանդակությունը` այդ թվում ապրանքային նշանը, դիզայնը, տեքստը, գրաֆիկական պատկերները, լուսանկարները և այլն, “Նարեկավանք Տուր” հեղինակային իրավունքն են:
Բովանդակության որևէ մաս չի կարող վերարտադրվել որևէ կերպ և որևէ միջոցով` էլեկտրոնային կամ այլ, առանց “Նարեկավանք Տուր”-ի նախնական գրավոր թույլտվության: