Վաղ առավոտյան Երևանից կուղևորվենք դեպի Բավրա` հայ-վրացական սահման: Կանցնենք Գյումրիով, ապա կհատենք սահմանը և կմտնենք Ջավախք: Կշարունակենք ճանապարհը դեպի վրաց-թուրքական սահման: Հատելով սահմանը` կճանապարհվենք դեպի Կարս: Կշրջենք քաղաքում, կտեսնենք միջնադարյան “Վարդանի” կամուրջը, Եղիշե Չարենցի ապրած տան ավերակները, Սբ. Առաքելոց եկեղեցին (10-րդ դար) և Կարսի բերդը, որ ժամանակին Հայոց թագավորության մայրաքաղաքի ամրոցն էր և Բագրատունիների թագավորանիստը: Շարունակելով ճանապարհը` երեկոյան կհասնենք և գիշերը կանցկացնենք Բայազետում:

Առավոտյան խումբը ավտոմեքենայով/ միկրոավտոբուսով կհասնի 2200 մ. կայանատեղի, որտեղից ոտքով կարշավի դեպի 3200 մ. բարձրության վրա գտնվող ճամբար: Բեռները կտանեն ձիերը: Ճաշը և ընթրիքը արշավային պայմաններում: Գիշերակաց 3200 մ. ճամբարում, վրաններում:

Առավոտյան խումբը կարշավի դեպի 4200 մ. բարձրության վրա գտնվող ճամբար: Բեռները կտանեն ձիերը: Ճաշը և ընթրիքը արշավային պայմաններում: Օրվա երկրորդ կեսից հանգիստ 4200 մ. ճամբարում, վրաններում, մինչ կեսգիշեր:

Կեսգիշերից հետո կսկսվի վերելք Արարատի գագաթ 4200-ից 5165 մ.: Բեռները կմնան ճամբարում, կվերցվեն փոքր ուսապարկեր` ջրի և այլ անհրաժեշտ իրերի համար: Երթուղու երկարությունն է 14 կմ., տևողությունը մոտ 6 ժամ: Լուսաբացին խումբը կհասնի Արարատի գագաթ, ուր կմնա 40 րոպե: Ապա վայրէջք 4200 մ. ճամբար` հանգիստ, վայրէջք 3200 մ. ճամբար` հանգիստ: Իր հայեցողությամբ խումբը կարող է գիշերել ճամբարում կամ շարունակել վայրէջքը մինչև Բայազետ և գիշերել հյուրանոցում:

Առավոտյան կայցելենք ուրարտական Տուշպա/ Վան բերդ (9-րդ դար մ.թ.ա.), ուր պահպանվել են Սարդուրի և Արգիշտի արքաների տպավորիչ դամբարանները և սեպագրերը: Քաղաքով անցնելիս կանգ կառնենք “”Սասնա Ծռեր” էպոսի Փոքր Մհերի ժայռափոր դռան մոտ: Այնուհետև կբարձրանանք Վարագա լեռը` Վասպուրական թագավորության հոգևոր առաջնորդարան Վարագավանք համալիր: Այստեղից կիջնենք դեպի Վանա լիճ, կնավարկենք դեպի Աղթամար կղզի, ուր գտնվում է իր նմանը չունեցող Սուրբ Խաչ եկեղեցին (10-րդ դար): Այն մինչև 2010 թվականի սեպտեմբեր ամիսը թանգարան էր, իսկ այժմ` գործող Հայկական եկեղեցի: Մենք կհամտեսենք հայտնի “Վանա տառեխ”-ը, որը լճում ապրող միակ տեսակի ձուկն է, և կվայելենք լողափում հանգստանալու և Վանա լճում լողալու հաճույքը: Ապա կվերադառնանք Վան: Գիշերակացը Վանում:

Առավոտյան կճանապարհվենք դեպի Դատվան քաղաք: Անցնելով այն` կբարձրանանք Նեմրութ լեռ` հրաբուխ, որի վերջին ժայթքումը տեղի է ունեցել ընդամենը երեք հարյուր տարի առաջ: Կբարձրանանք ոլորապտույտ ճանապարհով և կվայելենք գեղեցիկ տեսարաններ. Նեմրութ լիճը մեկ կողմից, Վանա լիճը` մյուս, իսկ եթե եղանակը պարզ լինի, կերևա նաև հպարտ Սիփանը: Կտեսնենք ժայռեր, որոնք ըստ լեգենդի կոչվում են “Նեբրովթի բանակ”, ինչպես նաև “Շամիրամի արցունքներ” կոչվող քարեր: Գեղատեսիլ և ջինջ կրատերային լճի մոտ հանգստանալուց հետո կճանապարհվենք դեպի Բիթլիս քաղաք (պատմական Բաղեշ), որ գտնվում է Տավրոսյան լեռների կիրճում: Այն եղել է Հայոց Աղձնիք նահանգի (բդեշխության), իսկ ավելի ուշ Քրդական Էմիրության (13-19-րդ դարեր) կենտրոն: Բիթլիսում ամենատպավորիչ տեսարանը նրա անառիկ բերդն է, որի հիմնադրումը վերագրվում է Ալեքսանդր Մակեդոնացուն: Բիթլիսից կմտնենք գեղեցիկ Մշո դաշտ` Տուրուբերան աշխարհի Տարոն գավառ, որի միջով հոսում է Արածանին (Արևելյան Եփրատը): Ապա կհասնենք Մուշ և կգիշերենք այնտեղ:

Առավոտյան կայցելենք Մուշի հին թաղամասի Սբ. Մարինե եկեղեցու կիսավերակը, որտեղից երևում է հայկական գերեզմանոցը, ուր գտնվում էր նաև Գևորգ Չաուշի գերեզմանը: Ապա կմոտենանք Եփրատ-Արածանի գետին, ուր կտեսնենք հայտնի Սուլուխի կամուրջը: Կանցնենք Մշո դաշտով և կբարձրանանք Հավատամքի լեռներ, ուր գտնվում են անմոռանալի տպավորություն թողող Մշո Սուլթան Սբ. Կարապետ վանքի ավերակները: Մշո դաշտից կուղևորվենք դեպի հյուսիս՝ Բարձր Հայք, Կարին-Էրզրում: Այստեղ կտեսնենք Թեոդուպոլիս ամրոցը, Սանասարյան վարժարանի շենքը, Չիֆթե Մինարե մեդրեսեն: Էրզրումից կշարժվենք դեպի Բասեն քաղաք, ճանապարհից ոչ հեռու կտեսնենք Բասենի բերդը: Կանցնենք այն և կանգ կառնենք գեղեցիկ Հովվի կամրջի մոտ, ուր խառնվում են Արաքս և Մուրց գետերը: Ապա Արաքսի հոսանքով և Կարմիր Փորակի գեղեցիկ լեռներով և անտառներով կճանապարհվենք դեպի Սարիղամիշ:
Ժամանակը թույլ տալու դեպքում կարող ենք շրջագայություն կատարել Սարիղամիշում և տեսնել ռուսական հին զորանոցները, ցարի որսորդական պալատը, ռուսական եկեղեցին (այժմ՝ մզկիթ): Գիշերակաց հյուրանոցում Սարիղամիշում կամ Կարսում:

Առավոտյան կմեկնենք առասպելական Անի, 9-11-րդ դարերի զորեղ Հայոց թագավորության հրաշալի մայրաքաղաք, որին անվանում էին “հազար ու մի եկեղեցիների քաղաք”: Անին իր ժամանակի խոշորագույն կրոնական, առևտրական և մշակութային կենտրոնն էր Եվրոպայի և Ասիայի խաչմերուկում, որով անցել է «Մետաքսի ճանապարհը»: Շրջելով Անիում` մենք կզգանք զորությունը միջնադարյան պարիսպների և աշտարակների, հռչակավոր տաճարների և պալատների, որոնք հազարամյակ անց կանգուն են մնացել: Անիից կուղևորվենք դեպի թուրք-վրացական սահման: Վրաստան կմտնենք, կանցնենք Ջավախքով և կհատենք վրաց-հայկական սահմանը: Ապա կանցնենք Գյումրիով, երեկոյան կժամանենք Երևան: